White Crow Art Daily

സുജീഷിന്റെ കവിതകള്‍

പോകുംവഴി

The dark scissors of his legs
cut the moon’s
raw silk — Agha Shahid Ali

നടക്കുംകാലുകൾ
—കാലത്തിന്‍റെ കത്രികകൾ
പോക്കുവരവുകളാൽ
ചെടികളെ വകഞ്ഞുമാറ്റി
രൂപംകൊടുത്ത വഴി,

വഴിവരച്ചുപോകും വിമാനം
പോയവഴി മായും
വാനിലെന്നപോലെ
വേനലിൽ പന്തുകളിക്കെത്തും
കുട്ടികളുണ്ടാക്കും മൈതാനത്തു
കാണാതാകും വഴി,

മഴപെയ്യുംകാലം വരുംന്നേരം
ചെടികളുടേതാകും മൈതാനത്തിൽ
തെളിഞ്ഞുകാണും

വീടുവിട്ടും

വീട്ടിലേക്കും

പോകുംവഴി—

പുതുവഴിയെന്നന്നു തോന്നുംവഴി.

3-K216-Y38 P.Klee, VAST (Rosenhafen) Klee, Paul 1879-1940. 'VAST (Rosenhafen)', 1925. 8 Oelpause und Aquarell auf gipsgrundierter Gaze auf Karton, 36 x 58,8 cm. Schweiz, Privatbesitz. E: P.Klee, VAST (Harbour of Roses) / 1925 Klee, Paul 1879-1940. 'VAST (Rosenhafen)' (VAST (Harbour of Roses)), 1925. 8 Oil transfer and watercolur on plaster- primed gauze on cardboard, 36 x 58.8cm. Switzerland, private collection.

യാതൊന്നും ചെയ്യാനില്ലാതെ
l
ഏറേനിലകളുള്ളൊരു ഫ്ലാറ്റിൽ
ഏതോനിലയിലൊരുമുറിയിൽ
ഏറെക്കാലമായൊരേ
പുസ്തകം വായിച്ചുകിടക്കും
വൃദ്ധനുറങ്ങിപ്പോകുന്നു.
ഉറക്കമുണരുമ്പോളെന്തോരം
വായിച്ചെന്നോർക്കാനാവാതെ
വീണ്ടും വായിച്ചുതുടങ്ങുന്നു.

II
ചിലനേരങ്ങളിലയാൾ
ചില്ലുജാലകത്തിലൂടെ
പുറത്തേക്കു നോക്കിനിൽക്കും.
ദൂരെ മൊട്ടക്കുന്നിനുച്ചിയിൽ
മെയ്മാസം കൈവിട്ട
വൃക്ഷാസ്ഥിയിൽ ഇലയില്ലായ്മ
പരിഹരിക്കാനെന്നോളം
ചില്ലകളിൽ ചേക്കേറുന്ന
മേഘങ്ങൾ കാണും—
തൻറെ പ്രിയപ്പെട്ടവളിൽ
നരച്ച മുടിയെന്നപോലെ.

III
പോകെപ്പോകെ നോട്ടം
ജാലകചില്ലിൽ തന്നെയാകും
നോക്കിനോക്കിനിൽക്കേ
ജാലകചില്ലിൽ തന്നെതന്നെ
കണ്ടുമുട്ടും.
കമിതാക്കളെഴുന്നേറ്റു പോകെ
ചുളിഞ്ഞുകിടക്കും
കിടക്കവിരി പോലെ
ചുക്കിചുളിഞ്ഞ മുഖം കാണേ
എത്രയെത്ര പെണ്ണുങ്ങൾ
ചുംബിച്ചാതാണീ മുഖത്തെന്നോർത്ത്
പല്ലില്ലാമോണകാട്ടി ചിരിക്കും.

in-the-style-of-kairouan-1914

കൊതുക്

കുറ്റിയിടാൻ വിട്ടുപോയ ജനൽ
വിട്ടുകൊടുത്ത വിടവിലൂടെ
കയറിവന്നൊരു കൊതുക്
നഗ്‌നനായി കിടക്കുമെന്‍റെ
തുടയിലിരിക്കുന്നു.

ചിറകടിതാളത്തിൽ പാടിപ്പറന്നുയർന്ന്
ചിന്തയറ്റു കിടക്കുമെനിക്കുചുറ്റും
വട്ടമിട്ടു കറങ്ങിയുറക്കം കെടുത്തവേ
കൈവീശിപ്പിടിക്കുന്നതിനെ ഞാൻ.

തുറക്കുമ്പോൾ കൈക്കുള്ളിൽ
ഒന്നുമില്ലെന്നുവരുമോ?
ഉണ്ടായിരുന്നൊരു കൊതുക്
കൈവിട്ടു പറന്നുപോകുമോ?
എന്‍റെ രക്തത്തിൽ

മരിച്ചുകിടക്കുമാ ചെറുജീവിയെ
കാണേണ്ടി വന്നേക്കുമോ?

ഇവ്വിധചിന്തകളാൽ പിന്നെയും
ഉറക്കംക്കെടുത്തുകയാണ്
കുറ്റിയിടാൻ വിട്ടുപോയ ജനൽ
വിട്ടുകൊടുത്ത വിടവിലൂടെ
ഞാനറിയാതിറങ്ങിപ്പോയ കൊതുക്.

 

വയനാട്ടില്‍ ജനിച്ചു. തിരക്കവിത.കോം -ന്റെ സ്ഥാപകരില്‍ ഒരാൾ.